– शेतकऱ्यांचे प्रश्न आवासून उभे
– प्रलंबित समस्या निकालात काढण्याचे वाली हरपल्याचा आरोप
मारेगाव : विटा न्यूज नेटवर्क
कृषी प्रधान देशाचा पोशिंदा अनेक अडचणींचा सामना करीत असल्याचे वास्तव नशिबाला चिकटून आहे.यात नैसर्गिक आपत्तीपासून वीज पुरवठा , वन्यप्राण्यांचा हैदोस उभे पिके नष्ठ करताहेत मात्र या गंभीर प्रश्नांचे निरसन करण्यात लोकप्रतिनिधी सपशेल अपयशी ठरत असल्याने शेतकऱ्यांचे अनेक मुलभूत प्रश्न आवासून उभे आहे.पालकमंत्र्यांना आपली कैफियत मांडण्यासाठी तेही आजतागायत फिरकले नसल्याने येथील शेतकऱ्यांनी थेट पोलिसात पालकमंत्री हरविल्याची तक्रार दाखल केली.या तक्रारीने शासन प्रशासनाचे शेतकऱ्याप्रती उदासीन धोरण चव्हाट्यावर येत आहे.
तालुक्यातील मार्डी परिसरातील शेतकऱ्यांच्या समस्या जैसे थे आहेत.या व्यथा नेमक्या कुणाकडे मांडायच्या हा यक्ष प्रश्न आहे.वडील म्हणून पालकमंत्रीच समस्यांचे निरसन करू शकतात ही भाबडी आशा घेवून शेतकरी असतांना पालकमंत्रीनेच आजतागायत फिरकून पाहिले नसल्याने नेमके ते हरविलेत काय ? असा उपरोधीत सवाल करीत , पालकमंत्री हरविल्याची तक्रार मारेगाव पोलिसात शेतकऱ्यांनी दिली आहे.
दरम्यान , तालुक्यात पांदण रस्ते नाही , विजेच्या लपंडावाने सिंचनाचा प्रश्न ऐरणीवर , रस्त्याची दुरावस्था , वन्यप्राण्यांचा हैदोसाने पिकांचे प्रचंड नुकसान आदी समस्येच्या गर्तेत सापडलेल्या शेतकऱ्यांना व्यवस्थेने सपशेल नाकारले आहे.आता पालक म्हणून मानगुटीवर बसलेल्या समस्या पालकमंत्र्यांनीच हाताळाव्या मात्र मारेगावचा चेहराच न पाहिलेले पालकमंत्री हरविल्याचा भास होत असतांना त्यांना शोधण्याची किंबहूना पालकमंत्री हरविल्याची तक्रार बहुसंख्य शेतकऱ्यांनी पोलिसात दाखल केली आहे.त्यांचा तात्काळ शोध घेवून आमच्या समस्या निकाली काढण्याची मागणी निवेदनातून करण्यात आली आहे.
याप्रसंगी अशोक धोबे , सुधाकर धोबे , प्रमोद खिरटकर , माणिक पांगुळ , संजय पारखी , नानाजी डाखरे , विजय धानोरकर , दौलत बदखल , सुरेंद्र काकडे , प्रमोद खंडाळकर , भास्कर दानखडे , संजय येरमे , नंदेश्वर आसुटकर यांचेसह बहुसंख्य मार्डी परिसरातील शेतकरी उपस्थित होते.
