– उपचारादरम्यान शेतकऱ्याचा मृत्यू
– मारेगाव वणी राज्य महामार्गावरील घटना
विटा न्यूज नेटवर्क : मारेगाव
वणी वरून कोळसा घेऊन यवतमाळ कडे जाणाऱ्या ट्रकने पादचारी शेतकऱ्यास जबर धडक देऊन दुसऱ्या दिशेला पलटी झाला.या अपघातात गंभीर जखमी झालेल्या शेतकऱ्याचा चंद्रपूर रुग्णालयात मृत्यू झाल्याने हळहळ व्यक्त होत आहे.सदर अपघात मंगळवारला रात्री 9.30 वाजताचे दरम्यान राज्यमहामार्गावर घडली.
सुरेश विश्वनाथ पारखी (40)रा.मारेगाव असे अपघातात मृत्यू झालेल्या शेतकऱ्याचे नाव आहे.ते मांगरुळ रस्त्यालगत असलेल्या शेतातून मारेगाव कडे आपल्या दिशेने पायदळ निघाले होते.
मागावून कोळसा घेऊन येत असलेला ट्रक क्रमांक MH 34 Bj 0046 ने सुरेश पारखी यांना जबर धडक देत ट्रक रस्त्याच्या दुसऱ्या बाजूला जाऊन पलटी झाला.ट्रक चालक मदिराचे सेवन करून असल्याने त्याचे नियंत्रण सुटून अवजड असलेला ट्रक दिशाहीन होत दुसऱ्या रस्त्याच्या कडेला पडला.अपघात होताच ट्रक चालकाने घटनास्थळावरून पोबारा केला.
राज्य महामार्ग असलेल्या मारेगाव मांगरुळ रस्त्यालगत झालेल्या अपघातात सुरेश पारखी हे गंभीर जखमी झाले होते.मारेगाव वरून त्यांना चंद्रपूर येथे हलविले मात्र उपचारादरम्यान त्यांचा रात्री 12 वाजता मृत्यू झाला.त्यांच्या पश्चात आई वडील , पत्नी व दहा वर्षाचा मुलगा आहे.
